Benvidos ao novo curso escolar!

 

Comezamos un novo curso cheo de proxectos e ilusión, desexando que todo o noso alumnado  veña con moitas gañas de aprender e desfrutar.

Cada inicio de curso ven acompañado dun montón de nervios, medos, incertidumes... Para facilitar a adaptación dos vosos fillos e fillas á escola non vivades con ansiedade este momento , evitade transmitir os vosos medos e inquedanzas, amosando unha actitude tranquila e alegre ante a volta á escola.Facede comentarios positivos cara a escola e as aprendizaxes. Vir ao colexio é unha sorte!. Amosade interese e valorade positivamente as actividades realizadas na escola, evitando interrogar polo seu sufrimento.Lembrádelle sempre que volveredes a recollelo/a e non mintades sobre o tempo que vai transcorrer nin o que vai facer o pai/nai mentres o neno ou nena está na escola. Non alonguedes as despedidas; deben ser afectuosas e breves e sede moi puntuais á hora de recollelo/a.

Estimulade todo o potencial dos vosos pequenos, facilitade o seu desenvolvemento cognitivo,  motriz, da linguaxe, a súa progresiva autonomía persoal, desenvolvemento social e emocional. Dedicádelle tempo, xogade e desfrutade xunt@s.

Mantede unha comunicación constante coa titora e ante calquera dúbida ou preocupación non dubidedes en poñervos en contacto connosco. Estamos aquí para axudar e desfrutar convosco do crecemento dos vosos fillos e fillas.

Os contos sempre nos axudan nas aprendizaxes. Para facilitar a adaptación ao centro compartimos algúns dos nosos preferidos.

Feliz curso 2023-2024

O centro conta cun Departamento de Orientación coordinado pola Orientadora, que ten como finalidade acadar a  cooperación de toda a Comunidade  Educativa para facilitar o  benestar emocional,  desenvolvemento persoal, social e académico dos vosos fillos e fillas. A Orientadora é un membro do equipo docente que vos pode asesorar na labor educativa e orientarvos na procura de solución aos problemas que poidan xurdir,  podendo contar  coa  súa axuda para todo o que precisedes.

Recordatorio para as familias interesadas: BECAS para alumnado con necesidades específicas de apoio educativo ata 20 de setembro. Máis información no seguinte enlace.

Unha nova etapa: Educación Primaria!

 

Levamos dúas semanas nas que o alumnado de 6º de Educación Infantil, coa axuda do alumnado de Educación Primaria, tanto do CRA de Bergondo como do CEIP Sada y sus Contornos, están á procura dun tesouro.

O alumnado de 6º EI comeza a estar nervioso polo cambio que supón o paso a Primaria. No caso do alumnado do CRA de Bergondo o cambio é maior xa que todos e todas van cambiar a un centro educativo máis grande, con profes, compañeiros e compañeiras novas. Pero estou segura que este cambio vai a ser sinxelo grazas á estupenda xornada de acollida que o CPI Cruz do Sar organizouo pasado venres día 9. Grazas ao Equipo Directivo, mestras de 1º e Departamento de Orientación,  pola xornada tan especial que preparáchedes con tanto agarimo.

Aquí tedes un vídeo que recolle algunhas imaxes do acontecido. Pinchade na imaxe para acceder. 

O alumnado de 6º EI do CEIP Sada y sus Contornos ten un cambio máis sinxelo, xa que  son coñecedores de case todos os espazos, mestres e compañeiros/as. Aínda así, hoxe,  o alumnado de 1º EP axudáronlles neste cambio e explicáronlles que é iso de Primaria e xunt@s descubriron diferentes espazos do centro, compartiron tempo de lecer e diversión. Pinchade na imaxe para ver fotos e vídeos da aventura polo cole!

E aquí as recomendacións desde o Departamento de Orientación para que o cambio sexa máis doado.

TEI: un final sen fin.

 Hoxe os titores/as do Programa Titoría Entre Iguais (TEI)  disfrutaron cos seus titorizados/as dunha sesión de xogos e merenda na praia. Aproveitamos a ocasión para despedir o curso e agradecer a gran labor, esforzo, compromiso e actitude positiva de todos e todas os titores de este curso.

 A amizade e axuda permanecerá para sempre!

Pinchade aquí para acceder as fotos. 

RECRE_ARTE: tempo de lecer para tod@s.

Neste terceiro trimestre, os martes e venres, o patio dinamizouse a través de xogos de movemento e creatividade os martes e venres, grazas á axuda do alumnado voluntario de 5º EP. 

O profesorado pensa que foi unha experiencia moi positiva, onde todo o alumnado participou de xeito gustoso (podedes pinchar aquí para ver algunhas instantáneas dos momentos vividos). 

Pero gustaríanos recoller a vosa opinión, completando a seguinte enquisa. Moitas grazas pola vosa opinión!. 

  

Colexio do Benquerer

 Ao longo deste curso, o alumnado de 5º e 6º de EP estiveron a aprender sobre o desenvolvemento afectivo sexual a través do Colexio de Benquerer (Fundación Meniños) traballando contidos relacionados co coñecemento e aceptación persoal, a diversidade, a comunicación e educación emocional e a prevención do abuso sexual infantil. O vindeiro curso seguiremos a disfrutar desta escola e as súas aprendizaxes!

Moitas grazas!

Nora marcha de vacacións

 Hoxe despedímonos de Nora e Laura. Tras un trimestre disfrutando da lectura con Nora, o alumnado de 4º EI, 1º e 2º acudimos á biblioteca para lerlle un conto entre todos e todas. Faremos un bonito mural coa súa silueta para decorar a nosa aula e enviarémoslle unha foto para que teña na  súa habitación. 

Moitas grazas a Laura e Nora, que pasedes un bo verán disfrutando do sol, o campo e a lectura compartida. 

Pinchade na imaxe para acceder ás fotos.

A UN PASIÑO DO IES!

O alumnado de 6º EP está a piques de comezar a súa andaina cara unha nova etapa da súa vida: o instituto.

Con nervios e ilusión hoxe disfrutaron dunha breve explicación de que é iso da ESO, recomendacións para enfrentarse a esta nova etapa con éxito e visitaron o IES Isaac Diaz Pardo ao que acudirán o vindeiro curso. Compartimos aquí imaxes do día de hoxe e a presentación realizada pola orientadora. 

Pinchade aquí para acceder á presentación. 

AXUDAS PARA ALUMNOS CON NECESIDADE ESPECÍFICA DE APOIO EDUCATIVO CURSO 23-24

 Desde o día de hoxe,  8 de maio de 2023 ata o día 20 de setembro de 2023, ambos inclusive, estará aberto o prazo para solicitar a beca para alumnado con Necesidade Específica de Apoio Educativo.

Poderán solicitar as axudas o alumnado que presente necesidades educativas especiais derivadas de discapacidade, trastornos graves de conduta ou trastornos graves da comunicación e da linguaxe, incluíndo ao alumnado con TDAH (Trastorno por déficit de atención por hiperactividade) o alumnado con TEA (Trastorno do espectro autista). Así como, axudas para programas específicos complementarios á educación regrada para alumnado con necesidade específica de apoio educativo asociado a altas capacidades intelectuais.

As solicitudes deben ser cubertas por Internet e entregadas posteriormente no centro educativo onde o alumno ou alumna estea escolarizado no curso 23-24. 

Acceso á solicitude: https://sede.educacion.gob.es/portada.html

Ditas becas  ofrecen distintos importes como axuda para ensinanza, transporte, comedor, residencia, libros, material didáctico e reeducación pedagóxica ou da linguaxe ou para programas dirixidos a alumnado con altas capacidades intelectuais.

No BOE nº 99 do 26 de abril de 2023 convócanse as seguintes axudas (pinchar aquí para acceder a texto completo): :

 

-           incluíndo ao alumnado con TDAH (Trastorno por déficit de atención por hiperactividade) que requiran apoios e atencións educativas específicas derivadas de discapacidade,   trastornos graves de conduta ou de trastornos graves da comunicación e da linguaxe asociados a necesidades educativas especiais. Tamén poderá ser beneficiario o alumnado con TEA.

-           por necesidades educativas especiais derivadas de discapacidade,   trastorno grave de conduta ou trastorno grave da comunicación e da linguaxe para familias numerosas. Tamén poderán ser beneficiarios de subsidios os alumnos afectados por TEA (Trastorno del espectro autista), pertencentes a familias numerosas, no incluídos no parágrafo anterior.

 Máis información aquí.

2 de Maio: Día Internacional contra a Violencia e o Acoso Escolar.

 O rexeitamento á violencia e ao acoso escolar é un dos principios fundamentais do noso centro educativo. Ao longo de todo o curso educamos neste rexeitamento e son moitas as actividades e accións desenvolvidas. Pero con motivo da conmemoración do 2 de Maio, estivemos a traballar de xeito especial a temática, a través de lecturas compartidas, de reflexións de fragmentos extraídos do libro de Alejandro Palomas "Un hijo" e a través de lemas (dentro das propostas do Programa TEI).  Pinchando na imaxe interactiva podedes acceder á música, rexeñas bibliográficas e lemas contra a Violencia e Acoso Escolar. 

Poster anuncio importante moderno creativo azul de Lucía Ruiz Casal

Temos profes novas na escola!

 Ao longo deste trimestre, os xoves, contaremos no noso centro con Laura e a súa cadela  Nora para disfrutar da lectura compartida. 

Alumnado de Educación Infantil, 1º, 2º e 3º poderán lerlle libros a Nora, unha das súas paixóns. Hoxe foi a primeira toma de contacto e puidemos coñecela, saber da súa historia persoal e o seu traballo, e puidemos saludala. Pinchando na imaxe podedes acceder ás fotos da xornada de hoxe. 

 O vindeiro xoves poderemos disfrutar dos libros con Nora e Laura na biblioteca. Estamos desexando que chegue ese día!

Moitas grazas a Laura e Nora, a R.E.A.D. (Programa de Lectura con Perros) e ao Concello de Sada que subenciona a totalidade do programa.

Xunt@s medramos!

 

RECRE_ARTE

 QUERES XOGAR COMIGO?

Un novo programa para dinamizar os patios e que todos e todas poidamos disfrutar do tempo de lecer vai dar comezo esta semana. 

A través do programa “ RECRE-ARTE” pretendemos estruturar algúns xogos de patio para que a partir da titoría entre iguais e supervisión dos adultos, o alumnado que presenta necesidades educativas asociadas a  dificultades na interacción cos iguais e habilidades no xogo compartido superen esas dificultades e se atopen incluídos no tempo de lecer e contribuír así á mellora da convivencia e previr posibles conflitos derivados do descoñecemento de como interatuar cos iguais que poden presentar algún dos nosos alumnos/as.

A polo 3º trimestre!

 Comezamos este trimestre coas pilas cargadas despois dun merecido descanso, non si? 

O noso estado emocional é fundamental para afrontar con éxito o noso día a día e ser quen de aprender e disfrutar. Comparto un decálogo para favorecer o benestar emocinal e saúde mental que nos axudará a todes.

Pinchade na imaxe para acceder ao documento

 Ao longo deste trimestre tocou aprender sobre escultura e amosamos a nosa gran creatividade con fermosas obras. Pero tamén empregamos a escultura como recurso para aprender a convivir e traballar en equipo. 

Hoxe toca compartir o gran traballo realizado por Gabriela, Julia e Lola e, sobre todo, a súa aprendizaxe. Pinchade na imaxe para acceder ao traballo. 

Pinchade aquí para acceder ao vídeo da exposición.

Aprendendo a convivir

 Continuamos a aprender a convivir. Estes días estamos traballando a tope en equipo. Tod@s están a rematar as súas obras de arte para transformar, unha vez máis, o noso centro nun fermoso museo cheo de esculturas. 

 Aprendemos a construir xunt@s unha escola mellor, na que todas e todos nos axudamos e respetamos. 

Desde o programa TEI puxemos o  noso gran de area a través da actividade de cohesión de ACROSPORT: o alumnado de 5º e 3º (titores e titorizados) realizamos "esculturas" cos nosos corpos.

      

Pinchade aquí para acceder ás fotos.

Aproveitamos tamén para poñer en común a nosa opinión sobre o programa TEI e valorar aspectos a mellorar.

Estas actividades foron  completadas coa formación por parte de Iván sobre Acoso Escolar, dentro do Plan Director de Convivencia, desenvolvida o mércores 22 co alumnado de 5º e 6º EP.

O vindeiro trimestre continuaremos coa construción dunha escola na que o respeto e axuda son os nosos piares fundamentais.  

Parabéns a toda a Comunidade Educativa!

 

ORGULLO

Orgullo é unha valoración moi alta de algo, dun ser querido ou dun mesmo.

Sinto orgullo da nosa escola, do seu alumnado, mestres e familias. Satisfación polo esforzo e o traballo realizado e por contribuir a avanzar cara unha sociedade máis xusta e respetuosa, solidaria e sostible. 

PARABÉNS!!

Por un mundo inclusivo a través do deporte!

 

Un dos nosos principios pedagóxicos do noso proxecto educativo é entender a diversidade coma un valor en si mesmo e moitas das actividades que organizamos para o noso alumnado teñen como obxectivo poñer e valor a diversidade funcional.

Hoxe o alumnado de 5º e 6º de Educación Primaria tiveron a sorte de escoitar a experiencia de Ángel e Daniel como membros de ENKI e a de outros deportistas con discapacidade como eles.

No mes de abril...continuará.

8M: Día da Muller

 Fai unhas semanas, o alumnado de 5º EP, dentro das actividades de titoría que se levan a cabo desde o Programa TEI, estiveron a traballar coa actividade "Depende de los 2". 

Hoxe, con motivo da conmemoración do 8M, representaron para todo o centro un baile coa canción traballada. Pinchade na imaxe para ver o vídeo. 

Aprendendo a convivir en igualdade!

Feliz Entroido!

 Hoxe é un día de festa e diversión, celebrando o noso Entroido de Arte. Desde o Departamento de Orientación aportamos unha pinga de cor e creatrividade  desde o "noso" POP ART.

Feliz Entroido!!

14 febreiro: Conferencia TEA alto funcionamento en A Coruña

 Por si é de interese da Comunidade Educativa, informamos da conferencia sobre TEA de alto funcionamento que organiza a Federación Autismo Galicia este martes 14 de febreiro.  Para máis información pinchade na imaxe.

7 de febreiro: Día da Internet Segura

  Manter unha comunicación fluída pode resultar determinante para que os nenos e nenas comprendan que o uso da Internet non está exento de riscos e débese utilizar seguindo unhas normas. Como adultos, deberiamos fomentar que nos alerten, pidan axuda ou consello cando teñan calquera dúbida ou atopen algunha cousa que lles resulte preocupante. 

Instruír aos menores en boas prácticas básicas para o uso da Internet é fundamental para seu uso seguro. Como elementos destacados destas boas prácticas podemos resaltar:

§  Emprego de contrasinais robustos. O uso de contrasinais difíciles de adiviñar, e a importancia de non repetilas nin compartilas, resulta un aspecto clave para protexer os nosos dispositivos e contas en liña.

§  Coñecer os riscos presentes nas redes sociais, é o primeiro paso para garantir a súa protección. Inculcar sobre a importancia da información que compartimos e como e con quen debemos interactuar, permite facer fronte a ameazas como a suplantación de identidade, grooming, ciberacoso, fraudes, discursos de odio, contidos inapropiados, etc.

§  Precaución coas redes WiFi públicas. As redes gratuítas non teñen as mesmas garantías de seguridade que as privadas. Poden facilitar accesos non desexados aos datos ou ao dispositivo. Recordar aos menores que se non teñen acceso á Internet, é mellor esperar a chegar a casa.

Acceso á Internet con equipos e aplicacións sempre actualizados. Un dispositivo actualizado está mellor protexido contra as ciberameazas.

Os programas de control parental, poden ser útiles a medida que o menor aprende a desenvolverse na Internet, regulando aspectos que deberiamos ter en conta para propiciar o seu uso seguro e responsable, permitindo, entre outros aspectos: 

§  Establecer límites no horario e tempo de uso.

§  Bloquear o acceso a contidos inapropiados.

§  Supervisar a actividade (navegación, procuras, aplicacións, redes sociais, etc.)

§  Protexer as configuracións do dispositivo e as aplicacións.

Por último, facer referencia a que na Internet existen numerosos recursos que nos axudan a favorecer un uso seguro e responsable da Internet por parte dos menores, por exemplo, na web IS4K (Internet Segura For Kids) ofrécense numerosas guías, materiais didácticos, ferramentas e outros materiais que nos poden resultar moi útiles.

Recomendacións da UAC (Unidade de Atención a Centros da Consellería)

TALLANDO PAZ, CONSTRUÍNDO CONVIVENCIA

 Unha das actividades realizadas o día de hoxe para a conmemoración do Día Escolar da Non Violencia e a PAZ foi tallar unha pomba coma a de Picasso. 

O alumnado titor de 5º EP e o seu titorizado de 3º EP, tallaron xunt@s  fermosas pombas e afianzaron un pouco máis o seu vínculo de axuda e amizade, partindo dos valores que a POMBA da PAZ simboliza. 

Pinchnado aquí podedes ver imaxes da actividade de cohesión realizad dentro do programa TEI. 

30 de Xaneiro: Día Escolar pola NON VIOLENCIA E PAZ.

 

Plan Director de Convivencia: novas tecnoloxías

 Un ano máis, o alumnado de 5º e 6º EP participaron na charla informativa ofrecida polo especialista   en convivencia da Garda Civil sobre o axeitado uso das novas tecnoloxías.

Para toda a Comunidade Educativa comparto novamente  un díptico informativo sobre a temática. Pinchade na imaxe para acceder.

E para máis información: 

* Guía de herramientas de control parental

* Guía de uso seguro y responsabilidad en Internet.

* Guía de seguridad en redes sociales.

Feliz 2023 e regreso ás aulas!

 

Feliz Ano!

Desde o Departamento de Orientación desexamos que este 2023 veña cargadiño de motivación para seguer a aprender, ilusión e moitas ganas de traballar; actividades enriquecedoras para todos e todas e de tempo felis de aprendizaxe.

Comezamos un novo trimestre con ilusión e con propostas desde o DO para as titorías para mellorar a Convivencia, o benestar emocional de todo o alumnado, o respeto á diversidade e inclusión de todo o alumnado, a través do Programa TEI, Escola do Benquerer e CRE_ARTE.